Псалом 143
1 Благослове́н Госпо́дь, Бог мой, науча́яй ру́ці мої́ на ополче́ніє, пе́рсти моя́ на бра́нь.
2 Ми́лость моя і прибі́жище моє́; Засту́пник мой і Ізбави́тель мой, Защити́тель мой, і на Не́го упова́х; повину́яй лю́ди моя́ под м’я.
3 Го́споди! Что єсть челові́к, я́ко позна́лся єси́ єму́? Іли́ син челові́ч, я́ко вміня́ши єго́?
4 Челові́к суєті́ уподо́бися: дні́є єго, я́ко сінь, прехо́дят.
5 Го́споди! Преклони́ небеса́ і сни́ди, косни́ся гора́м, і воздим’я́тся.
6 Блесни́ мо́лнію, і разжене́ши я; посли́ стрі́ли Твоя́, і см’яте́ши я.
7 Посли́ ру́ку Твою́ с висоти́, ізми́ м’я і ізба́ви м’я от вод мно́гих, із руки́ сино́в чу́ждих,
8 Ї́хже уста́ глаго́лаша суєту́, і десни́ца їх — десни́ца непра́вди.
9 Бо́же, пі́снь но́ву воспою́ Тебі́, во псалти́рі десятостру́ннім пою́ Тебі́.
10 Даю́щему спасе́ніє царе́м, ізбавля́ющему Дави́да, раба́ Своє́го, от меча́ лю́та.
11 Ізба́ви м’я і ізми́ м’я із руки́ сино́в чу́ждих, їхже уста́ глаго́лаша суєту́, і десни́ца їх — десни́ця непра́вди.
12 Ї́хже сино́ве їх я́ко новосажде́нія водруже́ная в ю́ности своє́й, дще́рі їх удобре́ни, преукраше́ни яко подо́біє хра́ма.
13 Храни́лища їх іспо́лнена отрига́ющая от се́го в сíє, о́вці їх многопло́дни, мно́жащияся во ісхо́дищих свої́х, воло́ве їх то́лсти.
14 Ність паде́нія опло́ту, нíже прохо́да, нíже во́пля в сто́гнах їх.
15 Ублажи́ша лю́ди, íмже сíя су́ть, блаже́нні, íмже Госпо́дь — Бог їх.
Псалом 144
1 Вознесу́ Тя, Бо́же мой, Ца́рю мой, і благословля́ю ім’я́ Твоє́ в вік і в вік ві́ка.
2 На всяк день благословлю́ Тя і восхвалю ім’я́ Твоє́ в вік і в вік ві́ка.
3 Ве́лій Госпо́дь і хва́лен зі́ло, і вели́чію Єго́ ність конца́.
4 Род і род восхва́лят діла́ Твоя́, і си́лу Твою́ возвістя́т.
5 Великолі́піє сла́ви святи́ні Твоє́я возглаго́лют, і чудеса́ Твоя́ повідя́т.
6 І си́лу стра́шних Твої́х реку́ть, і вели́чіє Твоє́ повідя́т.
7 Па́м’ять мно́жества бла́гості Твоє́я отри́гнут і пра́вдою Твоє́ю возра́дуются.
8 Щедр і ми́лостив Госпо́дь, долготерпіли́в і многоми́лостив.
9 Благ Госпо́дь вся́ческим, і щедро́ти Єго на всіх ді́ліх Єго.
10 Да ісповідя́тся Тебі́, Го́споди, вся діла́ Твоя́, і преподо́бнії Твої́ да благословя́т Тя.
11 Сла́ву Ца́рствія Твоє́го реку́т, і си́лу Твою́ возглаго́лют,
12 Сказа́ти сино́вом челові́ческим си́лу Твою́, і сла́ву великолі́пія Ца́рствія Твоє́го.
13 Ца́рство Твоє́ — ца́рство всіх віко́в, і вели́чество Твоє́ во вся́ком ро́ді і ро́ді; ві́рен Госпо́дь во всіх словесíх Свої́х і преподо́бен во всіх дíліх Свої́х.
14 Утвержда́єт1 Госпо́дь вся низпада́ющия і возставля́єт вся низверже́нния.
15 О́чі всіх на Тя упова́ют, і Ти дає́ши їм пи́щу во благовре́менії.
16 Отверза́єши Ти ру́ку Твою́ і ісполня́єши вся́коє живо́тно благоволе́нія.
17 Праведе́н Госпо́дь во всіх путе́х Свої́х, і преподо́бен во всіх дíліх Своїх.
18 Близ Госпо́дь всім призива́ющим Єго, всім призива́ющим Єго во і́стині.
19 Во́лю боя́щихся Єго́ сотво́рит, і моли́тву їх усли́шит, і спасе́т я.
20 Храни́т Госпо́дь вся лю́бящия Єго́, і вся грі́шники потреби́т.
21 Хвалу́ Госпо́дню возглаго́лют уста́ моя́, і да благослови́т вся́ка плоть ім’я́ свято́є Єго́ в вік і в вік ві́ка.
Сла́ва: Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
Алилу́я, алилу́я, алилу́я, сла́ва Тебí, Боже (тричі). Го́споди, поми́луй (тричі).
Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
Псалом 145
1 Хвали́, ду́ше моя́, Го́спода!
2 Восхвалю́ Го́спода в животі́ моє́м, пою́ Бо́гу моє́му, до́ндеже єсм.
3 Не наді́йтеся на кня́зі, на сини́ челові́ческія, в ни́хже ність спасе́нія.
4 Ізи́дет дух єго́ і возвра́тится в зе́млю свою, в той день поги́бнут вся помишле́нія єго́.
5 Блаже́н, єму́же Бог Іа́ковль — помо́щник єго, упова́ніє єго на Го́спода Бо́га своє́го,
6 сотво́ршаго не́бо і зе́млю, мо́ре і вся, я́же в них. Храня́щаго íстину в вік,
7 творя́щаго суд оби́димим, даю́щаго пи́щу а́лчущим; Госпо́дь ріши́т окова́нния,
8 Госпо́дь умудря́єт сліпци́, Госпо́дь возво́дит низверже́нния, Госпо́дь лю́бит пра́ведники.
9 Госпо́дь храни́т прише́льци; си́ра і вдову́ при́ймет, і путь грíшних погу́бит.
10 Воцари́тся Госпо́дь во вік, Бог твой, Сіо́не, в род і род.
Псалом 146
1 Хвалíте Го́спода, я́ко бла́г псало́м. Бо́гові на́шему да услади́тся хвале́ніє.
2 Зижда́й Ієрусали́ма Госпо́дь, разсі́янія Ізра́їлева собере́т.
3 Ісціля́яй сокруше́нния се́рдцем і об’язу́яй сокруше́нія їх.
4 Ісчита́яй мно́жество звізд, і всім їм імена́ нарица́яй.
5 Ве́лій Госпо́дь наш і ве́лія крі́пость Єго́, і ра́зума Єго ність числа́.
6 Приє́мляй кро́ткія Госпо́дь, смиря́яй же грі́шники до землі́.
7 Начнíте Господеві во ісповіда́нії, по́йте Бо́гові на́шему в гу́слех,
8 одіва́ющему не́бо о́блаки, уготовля́ющему землі́ дождь, прозяба́ющему на гора́х траву́, і злак на слу́жбу челові́ком,
9 даю́щему ско́том пи́щу їх, і птенце́м вра́новим, призива́ющим Єго́.
10 Не в си́лі ко́нстій восхо́щет, нíже в ли́стіх му́жеских благоволи́т.
11 Благоволи́т Госпо́дь в боя́щихся Єго́ і во упова́ющих на ми́лость Єго.
Псалом 147
1 Похвали́, Ієрусали́ме Го́спода, хвали́ Бо́га твоє́го, Сіо́не.
2 Я́ко укріпи́ ве́рія врат твої́х, благосло́ви сини́ твоя́ в тебі́.
3 Полага́яй преді́ли твоя́ ми́р, і ту́ка пшени́чна насища́яй тя́.
4 Посила́яй сло́во Своє́ землі́, до ско́рості тече́т сло́во Єго́.
5 Даю́щаго сніг Сво́й, я́ко во́лну, мглу, я́ко пе́пел, посипа́ющаго.
6 Мета́ющаго го́лоть Свой, я́ко хлі́би, проти́ву лица́ мра́за Єго́ кто посто́їт?
7 После́т сло́во Своє́, і іста́єт я, дхне́т дух Єго, і потеку́т во́ди.
8 Візвіща́яй сло́во Своє́ Іа́кову, оправда́нія і судьби́ Сво́я Ізра́їлеві.
9 Не сотвори́ та́ко вся́кому язи́ку, і судьби́ Своя не яви́ їм.
Сла́ва: Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
Алилу́я, алилу́я, алилу́я, сла́ва Тебí, Боже (тричі). Го́споди, поми́луй (тричі).
Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
Псалом 148
1 Хвалі́те Го́спода з небе́с, хвалі́те Єго́ в ви́шних.
2 Хвалі́те Єго́, всі а́нгели Єго, хвалі́те Єго, вся си́ли Єго́.
3 Хвалі́те Єго́, со́лнце і луна́, хвалі́те Єго, вся́ зві́зди і світ.
4 Хвалíте Єго́, небеса́ небе́с, і вода́, я́же преви́ше небе́с.
5 Да восхва́лят ім’я́ Госпо́днє, я́ко Той рече́ — і би́ша, Той повелі́ — і созда́шася.
6 Поста́ви я в вік і в вік ві́ка, повелі́ніє положи́, і не ми́мо іде́т.
7 Хвалі́те Го́спода от землí, зміє́ве і вся бе́здни:
8 огнь, град, сніг, го́лоть, дух бу́рен, творя́щая сло́во Єго́,
9 го́ри і всі хо́лми, дре́ва плодоно́сна і всі ке́дри,
10 Зві́ріє і всі ско́ти, га́ди і пти́ці перна́ти.
11 Ца́ріє зе́мстії і всі лю́діє, кня́зі і всі су́дії зе́мстії.
12 Ю́ноші і ді́ви, ста́рци с ю́нотами.
13 Да восхва́лят ім’я́ Госпо́днє, я́ко вознесе́ся ім’я́ Того́ Єди́наго, ісповіда́ніє Єго́ на землі́ і на небесі́.
14 І вознесе́т рог люде́й Свої́х, піснь всім преподо́бним Єго́, сино́вом Ізра́їлевим, лю́дем, приближа́ющимся Єму.
Псалом 149
1 Воспо́йте Господеві піснь но́ву, хвале́ніє Єго́ в це́ркві преподо́бних.
2 Да возвесели́тся Ізра́їль о Сотво́ршем єго́, і сино́ве Сіо́ні возра́дуются о Царí своє́м.
3 Да восхва́лят ім’я́ Єго́ в ли́ці, в тимпа́ні і псалти́рі да пою́т Єму́.
4 Я́ко благоволи́т Госпо́дь в лю́дех Свої́х і вознесе́т кро́ткія во спасе́ніє.
5 Восхва́лятся преподо́бнії во сла́ві і возра́дуются на ло́жах свої́х.
6 Возноше́нія Бо́жія в горта́ні їх, і мечі́ обою́ду о́стри в рука́х їх.
7 Сотвори́ти отмще́ніє во язи́ціх, обличе́нія в лю́дех.
8 Связа́ти царі́ їх пу́ти, і сла́вния їх — ручни́ми око́ви желі́зними.
9 Сотвори́ти в них суд напи́сан. Сла́ва сíя бу́дет всім преподо́бним Єго́.
Псалом 150
1 Хвалі́те Бо́га во святи́х Єго́, хвалі́те Єго́ во утверже́нії си́ли Єго́.
2 Хвалі́те Єго на си́лах Єго́, хвалíте Єго́ по премно́гому вели́чествію Єго́.
3 Хвалíте Єго́ во гла́сі тру́бнім, хвалі́те Єго во псалти́рі і гу́слех.
4 Хвалíте Єго́ в тимпа́ні і ли́ці, хвалíте Єго́ во стру́нах і орга́ні.
5 Хвалíте Єго́ во кимва́ліх доброгла́сних, хвалíте Єго́ в кимва́ліх восклица́нія.
6 Вся́коє диха́ніє да хва́лит Го́спода.